Highway 12 ဖံက်တုဲမ္ဂး ပရေင်တဴတက်ဗီုလဵု ဆက်ဒှ်ကၠုင်မာန်ရော

ဂလာန်ညးဒါန်ပရိုင်ကဴဝဴ ( ၈ ဂျောန် ၂၀၂၃)

ဍုင်ဗၟာ၊ သေံ၊ လဴ သွက်ဂွံတတ်ကၠောံ ၃ ဍုင်ဂးတုဲ ကဵုလဝ်ယၟုဂၠံင်ဇၞော် Highway 12 ဏံ အခိင်လၟုဟ် အဆံင်လက်ကရဴအိုတ် စိုပ်အာဒတုဲရဂှ် လိက်ပရိုင် Bangkok Post ချူလဝ်ရ။    

ဟိုတ်နူဂၠံင်ဇၞော်ဏံတုဲဒှ်အာဂှ်တှ်ေ အကြာ ဗၟာ၊ သေံ၊ လဴ ၃ ဍုင်ဏံ ပရေင်ကူသာန်ဆက်စၠောံကလိတ်ကလေတ်ခိုဟ်တိုန်တုဲ ပရေင်ပိုန်ဒြပ်တဴတက်ကၠုင်ရောင် အလဵုအသဳသေံတံ ဒစးဒုင်စၟဳစလဝ်ရ။  

ကောန်ရးဒေသဧသာန် သွက်ညးဍုင်ကွာန် နွံမံင်ဍုင်ကလာသေန် ကေုာံ ဍုင်မူဒါဟာန်တံ ဂုဏ်ဖဵုပရေင်ပိုန်ဒြပ်ဇၞော်တိုန်ကၠုင်ရောင် သ္ကိုပ်ဝန်ဇၞော်သေံလၟုဟ် စၟဳစမံင်ဂးရ။

ဂၠံင်ဇၞော် Highway 12 ဏံဂှ် ဒှ်မံင်တၞာင်ဗၠာင်ကု ကိုန်အစဳဇန်ဂၠံင်စကြႅန်ပရေင်ပိုန်ဒြပ်ဗၟံက်-ပလိုတ် (East-West Economic Corridor- EWEC) မွဲတုဲ နူကဵုဍုင်ဗၟာ ဒဵုကဵုဍုင်ဗဳယက်နာမ် ဆက်စပ်ဖံက်စၠောံလဝ်ရောင် ဂွံတီရ။

ၜဳကြုက်သၠုင်ကျာကဵု သၞေဟ်သြင်ၜဳအက်ဒမာန်ဍုင်မန်ပိုဲဏံ ဆက်စၠောံလဝ်ကဵု ဂၠံင်ဇၞော် Highway 12 ဏံတုဲ စပ်ကဵုလဝ်ဂျေတ်သတေတ်ကီု သီုကဵုပရေင်ကူသာန်သွံရာန်ကေုာံ ကဏ္ဍကၟုဲအာတရဴတံကီု ဒှ်အထံက်အပင်ဗွဲမဂၠိုင်ရောင် အလဵုအသဳသေံ ပတေဟ်စလဝ်ရ။  

ဂၠံင်ဇၞော်ဏံ ပၞောဝ်ကဵုဇမၠိင် ၁၅၃၀ ကဳလိုမဳတာဂှ် ဍုင်သေံပါလုပ်မံင် ၇၉၃ ကဳလိုမဳတာ စပ္တံနူဒၞာဲ ဒဒန်ပရေင်ဆာန်ကၟိန်ဗၟာ-သေံ (ဗြဝတဳ-မာဆံက်) လၟိဟ်(၂) ရောင်။

ဆဂး အကြာတွဵုရးမန် ဍုင်မတ်မလီုကေုာံ တွဵုရးကရေင် ဍုင်ဗြဝတဳ နွံမံင်သ္ရောဲခြာဗၞတ်ၜိုတ် ၉၅ ကဳလိုမဳတာဏံဂှ် အခိင်လၟုဟ်မ္ဂး အကြာဒပ်ပၞာန်ဗၟာကဵု ဒပ်ပၠန်ဂတးကရေင်ပံင်တောဲလဝ်ကု ရဲဂကောံပၠန်ဂတးတဲပိတၞုင်တံ ပေါဲဗတိုက်ဒှ်မံင်အရိုဟ်တ္ရဲဆက်ဆက်တုဲ မကမ်လွဟ်ဇၞော်ဍောတ် သီု ၂ လပါ်ပန်ကၠဟ်မံင်ညးသ္ကံ၊ ၜၚ်ကျာပၞာန်ဗၟာထောံဗုမ်နာနာ၊ ညးဍုင်ကွာန်ရဲနွံမံင်ဒေသတံဏံ ဒးဂြိပ်ပါဲအောပ်မာမံင်အရိုဟ်ဟ်တ္ရဲ ရဴသာ်ဝွံ ပရေင်ပန်ပှော်ဂစိုတ်ဂယျိုင်ကြီုဓဇန်မံင် အနိဌာရုံပၟတ်ပၞာန်ဂဵုသၠာန်မံင်အိုတ်စောန်ဂှ်ရ ပ္ဍဲဒေသမွဲဏံ ပရေင်ၜိုဟ်လလမ်ဟၟဲမံင်ရောင်။

ဇၟာပ်ပ်အလဵုအသဳဆေင်စပ်တံ စၟဳစလဝ် ပရေင်တဴတက် ဂွံဒှ်အာမန်ဟီုကီုလေဝ် နကဵုပကတိရုပ်လၟုဟ် ဒှ်ဟွံမာန်ဏီ။

ဟိုတ်ဂှ်ရ ပရေင်ဍုင်ကွာန်၊ ပရေင်ပၞာန်ဍုင်ပိုဲဏံ ၜိုတ်လလမ်မှလေဝ် ပရေင်ဆက်စၠောံအာကၠုင်လ္တူဂၠံင်ဏံ ဒှ်မာန် ပရေင်တဴတက်ဒေသတံဏံဒှ်မာန် နကဵုအလဵုအသဳဆေင်စပ်တံ ဗီုလဵုဆက်ရေင်တၠုင် ဖန်ဖက်ပြုပြင်စဳရေင်အာရောဟီုဂှ် နကဵုကဴဝဴ ဆက်လ္ရတ်ဆက်ဗဵု ဆက်မင်ရံင်အာပၠန်ရောင် ကဵုဏာသမ္တီရအဴ။

Source; Bangkok Post.