ပ္ဍဲဍုင်သေံ ဟိုတ်နူပလီုကောန်ဗြဴသမ္ဘာညးတံတုဲ ဂစိုတ်ထောံမၞိဟ်ကၠောန်စအကြာ(ပွဲစား) ကောန်ဍုင်ဗၟာမွဲတၠ

.ကဴဝဴ (ဂျောန် ၇-၂၀၂၃)

ဟိုတ်နူ ပလီုပလိုက်လဝ်သမ္ဘာဒေံညးတံတုဲ ဂစိုတ်ထောံလဝ်ရောင် ပ္ဍဲဍုင်သေံ ခရိုင်စမုသာခေါမ် အကြာသၟာကမၠောန်ကောန်ဍုင်ဗၟာ ရဲကၠောန်စအကြာ(ပွဲစား) မေန်အံင် (၄၀ သၞာံ) အမှုဒးဒုင်ဂစိုတ်လဝ်ဂှ် နကဵုသံသယ ရပ်ဂွံလဝ် ညးလုလောန်ဒုဟ် ၅ တၠယျ ညးတာလျိုင်ဗၠာဲသၟိင်သေံ နူတနေံတေံသဝ်တ္ရဲ သောင်ကလးလဝ်ပရိုင်ရ။

စပ်ကဵု ရဲကၠောန်စအကြာ(ပွဲစား) မေန်အံင် ဒးဒုင်ဂစိုတ်လဝ်ဂှ် နကဵုသံသယရပ်ဂွံလဝ် သာယာအံင် (၃၀ သၞာံ) မေန်ထိတ် (၂၄ သၞာံ) သိုဝ်မေန်တူ (၃၃ သၞာံ) ချေတ်အံင် (၃၅ သၞာံ) နိုင်လေန် (၂၄ သၞာံ) တံကဵု ကွဳစက် ၂ မ၊ ၜုန် ၃၀ သေန်တဳမဳတာ မွဲတၞုင် နကဵုသက်သဳ သီဂွံလဝ်ရောင် ညးတာလျိုင်ဗၠာဲသၟိင်ဟီုရ။  

မၞိဟ်သံသယဒုဟ် ၅ တၠတံဏံ ရပ်ဂွံနင် ဒၞာဲသ္ရိမွဲမ အောပ်ဗ္ဒမံင် ပ္ဍဲကွာန်ဗဳလံက် ပွိုင်ဍုင်ထဝ်ခၞောန် ခရိုင်ကာန်မရဳ ဗၠာဲသၟိင်သေံတံ ဂးရ။

နူကဵုညးကၠာဲဘာသာမွဲအဆံင် အတိုင်စၟဳစၟတ်သၟာန်သၟုဟ်လဝ် ချေတ်အံင်ဂှ်မ္ဂး “မေန်အံင် ကေတ်လဝ်သြန်တုဲ ဟွံကၠောန်ကဵုလိက်အုပ်ကီု၊ ပလီုပလိုက်သ္ပလဝ်ကောန်ဗြဴကဵု ဒေံညးတေံကီု စပ်ကဵုပရေင်သၟာကမၠောန် စိုတ်ဂိလဝ်နွံတုဲ ဂစိုတ်လဝ်ဂးရ။

တုဲပၠန် မေန်အံင်ဂှ် သ္ပလဝ်ကောန်ဗြဴကဵုသမ္ဘာ ဒေံဗြဴညးဒုင်ရပ်ဂွံလဝ်မွဲတၠပၠန်ဂှ်တုဲ နကဵုစိတ်ဂိဟေင် ကော်ရပ်ဏာသီုကဵုကွဳစက် ၜုၚ်တက်ပျဲပျာံမံင်ဂှ် မေန်အံင်ဝိုတ်ဝုဲအာတုဲ ရေက်ကအ်၊ ဇွမေန်အံင်မချိုတ်လဝ်ဂှ် အာကၠဟ်ထောံလဝ် ပ္ဍဲကဵုကၟာင္ရုဲမွဲဒၞာဲကီု ကွဳစက်ဍေံဂှ် အာထောံလဝ် ခရိုင်ဖေတ်ပူရဳမွဲဒၞာဲရဂှ် မၞိဟ်သံသယရပ်ဂွံလဝ် ၅ တၠတံ ပတိတ်စလဝ်နွံ သ္ကိုပ်ဗၠာဲသၟိင်မွဲတၠ ဂးရ။ .

အပ္ဍဲကဵုရပ်ဂွံလဝ် မၞိဟ် ၅ တၠဏံဂှ် ညးမကေင်ရပ်စပ်စကာလွဟ်စီုသကီု  ဂစိုတ်မၞိဟ်လေဝ်တဲခံင် ကောန်ဂကောံ God Army တြေံပါလုပ်မံင်ကီု ညံင်ရဴဂိုဏ်မာဖဳယျာမွဲ ဂကောံဍေံတံချဳဒရာင်မံင်တုဲ ပရေင်ဘပဠဂီုကၠီုဂကောံမၞိဟ်နွံကၠုင်မံင်ဂှ်ရ ကၠာဇြဟတ်ဍေံတံဟွံဇၞော်တိုန် မ္ဒးင္ရးတးလဝ်ရိုဟ်ကၞက်ကၠာကၠာရောင် သ္ကိုပ်ဗၠာဲသၟိင် ဆက်ဟီုရ။

လောန်ကၠုင် ဂျောန် ၂ အခိင်နူဂယးပြဟ်ဂှ် ညးတြုံ ၅ ရပ်ကော်ဏာ မေန်အံင် သီုကဵုကွဳစက် နူဒၞာဲဒၟံင် ခရိုင်သမုသာခေါမ်တုဲ ဂစိုတ်ကၠဟ်ထောံလဝ်ဇွ ပ္ဍဲကဵုဗရံင်ဍာ် သမုသောင်ခရာမ်ရာဲ ကွာန်ၜါန်စကရာန် မွဲဒၞာဲဂှ် ဗၠာဲသၟိင်တံ ပတိတ်လဝ်ပရိုင် ဂွံဆဵုရ။

Source; Myanmar Live

# ပလီုပလိုက်သမ္ဘာ #ပရိုင်ကဴဝဴ #ဂစိုတ်မၞိဟ် #မၞိဟ်ကၠောန်စအကြာ(ပွဲစား) #ကောန်ဍုင်ဗၟာ
#God Army