ဇွိုန်လပှ်ပရေင်ဍုင်ကွာန်လၟုဟ် ကျာန်မံင်ဏောင် ညးဒးညးဒုင်လ္ပကဵုဒှ်ညိ၊ ကျာ်ဇၞော်ဟံသာထဝ် ဟီုသြဝါဒ

အခိင်လၟုဟ်ဏံ ဇွိုန်လပှ်ပရေင်ဍုင်ကွာန်ကျာန် (ကြာန်) မံင်တုဲ ဂကူမန်တံမံင်စံင်တန်တဴမံင်ၜိုဟ်ဟ်သြိုဟ်ဟ်ဗီုလၟုဟ်ဏံဂှ် ညးတၞဟ်ညာတ်စဂကူမန်ဟွံဂွံနွံမံင်ဂှ်ရ မန်တံဒးညဳသာဏောင် ကျာ်ဇၞော်ဟံသာထဝ် ဘဒ္ဒန္တသဳလဝန္တ ဟီုဏာဂလာန်သြဝါဒ ဒၞာဲအသေအဟာန်ပ္တိုန်ဂုဏ်စရာဲကွးဘာမန်ဥတုက္ညၚ် ပွိုၚ်ဍုၚ်ဇြပ်ဗု ပ္ဍဲကဵုစၟတ်တ္ရဲ မေ ၂၇ ဏံရ။

“ဇွိုန်လပှ်မတွံဂး ပရေင်ဍုင်ကွာန်လၟုဟ် ကျာန်(ကြာန်)မံင်ဏောင် ဍေံဟွံရုဲ ၝတေံၝဏံပုဟ်တှ်ေ ပိုဲလေဝ်ဒးဍိုဟ်ကေက်မှ ဒးတီလဝ်ပ္ဍဲက္ဍဟ်နွံမှ၊ မုဟွံတီပုဟ်တှ်ေ အာဂတဏံ ပိုဲဂိဏောင်၊ ညးဒးညးဒုင်လ္ပကဵုဒှ်ညိ”

အသေအဟာန်ပ္တိုန်ဂုဏ်စရာဲကွးဘာမန်ဥတုက္ညၚ် မရနုက်ကဵု(၂၄)ဝါ ပွိုၚ်ဍုၚ်ဇြပ်ဗု ကၠောန်ဗဒှ်ဏာ ဒၞာဲဘာတြေံ ကွာန်တံၚ်ဖလုတ်ဂှ် သင်ခၟဳဂမၠိုင်တံကီု ညးတာလျိုင်ဂကောံလိက်ပတ် ပွိုင်ဍုင်ပွိုင်တိုက်ကေုာံ အဆံင်ကွာန်ဂမၠိုင် ကွးဘာဥတုကညင်ဂမၠိုင် တိုန်စိုပ်လဝ်ဂြုဂြုဂြီုဂြီုရ။

“ဂကူပိုဲမန် မန်ပိုဲမံင်ၜိုဟ်သြိုဟ် ညးတၞဟ်ဒးစိုတ်ဟွံသေင်ပုဟ်၊ နူတနေံနူကၞိတေံ မိင်မံင်ရ ပ္ဍဲအနေင်တေံ ချိုတ်ယျမွဲ၊ တုဲတှ်ေပ္ဍဲဆော်ပလိုင် ပန်စုတ်ကွးဘာ ဆ, မွဲဟွံဒးပုဟ် အေဗီုဏံလေဝ် ခိုဟ်ဟွံသေင်ပုဟ်၊ ပိုဲကဵုပိုဲညဳသာမှ လဂှ်မှ ဟီုကဵုညးတၞဟ်ဂွံ၊ ညးဒးညးဒုင် အဲဒးအဲဒုင်တှ်ေ ဂကူပိုဲဂှ်ပြးဆာဲမံင်တွဵုရ” ကျာ်ဇၞော် ဟံသာထဝ် ဆက်မြော်ဏာရ။

ဂကူမန်ပိုဲအနာဂတ်ဂတ ရဲဍောတ်တ်ဏံရ ဂွံကောန်တှ်ေ တင်ယၟုမန်ညိ၊ ဇၞော်တိုန်တှ်ေ လိက်မန်ဂွံလေပ် ကဵုဍေံဗတောန်၊ ပညာနွံမှ ဒှ်ဒတုဲမြမောဝ်ဂကူ၊ ပညာနွံမှ ထိင်ဂကူလေပ်ဏောင်၊ ပညာနွံမှ ထိင်ပိုန်ဒြပ်လေပ်ဏောင် ဟိုတ်ဂှ်ရ ကောန်ဇကု ဒးဗတောန်ပညာဂှ် လ္ပဂိုဟ်ညိ သာ်ဝွံ ကျာ်ဇၞော်ဟံသာထဝ် ဟီုမြော်ဏာရ။

တုဲပၠန် ကျာ်ဇၞော်ဘာနန္ဒဝိုန် ဘဒ္ဒန္တခေမာနန္ဒ နကဵုက္ဍိုပ်လိက် “လေပ်လိက်မန် သုင်စောဲဒၞာဲလဵုရော” ကဵုဏာဥပမာနာနာသာ်တုဲ သောင်ကလးကဵုဏာသြဝါဒ ကုညးတိုန်စိုပ်လဝ်အသေအဟာန်ဏံရ။

အသေအဟာန်ပ္တိုန်ဂုဏ်စရာဲကွးဘာမန်ဥတုက္ညၚ် မရနုက်ကဵု(၂၄)ဝါ ပွိုၚ်ဍုၚ်ဇြပ်ဗု သၞာံ ၂၀၂၃ ဏံ လၟိဟ်ကွးဘာလုပ်သှ်လိက် အဆံၚ်ပွိုၚ်ဍုၚ် (၁၂၆၂)တၠဂှ် ကွးဘာ (၉၁၉)တၠ အံင်ဇၞးအာ ဂွံလဝ်ပရိုင်ရ။

(မိက်ဂွံဗဵုကလင် ဂလာန်သြဝါဒ ကျာ်ဇၞော်ဟံသာထဝ်မ္ဂး) https://www.facebook.com/watch/?v=1716695388746260
Photos by- အအာ