ဂကောံသၟတ်မန်ပွိုၚ်ဍုၚ်မုဟ်ဍုၚ် ပြံၚ်သၠာဲညးတာလျိုၚ်တၟိ

ရန်တၟအ်ကဵု သၟတ်မၞုံပ္ဍဲပွိုၚ်ဍုၚ် မွဲကွာန်ကဵုမွဲကွာန် မွဲပွိုၚ်တိုက်ကဵုမွဲပွိုၚ်တိုက် ညံၚ်သ္ဂောံကၠောံဍ ညးသ္ကအ်မာန်ကီု သွက်သ္ဂောံရုပ်သီထောံ ပြံၚ်သၠာဲညးတာလျိုၚ်တြေံ/တၟိဂမၠိုၚ်တုဲ ပ္ဍဲကဵုဂိတုဇှ်ေ (၉) မံက် (၂၇၊၅၊၂၀၂၃) နူကဵုညးတာလျိုၚ်သၟတ်ပွိုၚ်ဍုၚ်ဂမၠိုၚ် ကၠောန်သ္ပကၠုၚ်လဝ်ကောံဓရီုဇၞော် ဂကောံသၟတ်ပွိုၚ်ဍုၚ်မုဟ်ဍုၚ် ဂွံပရိုင်ရ။

ပ္ဏ္ဍဲကဵုပေါဲကောံဓရီုဝွံ ဂကောံသၟတ်နူပွိုင်တိုက်နာနာဂမၠိုၚ်ကီု၊ သၟတ်မလုပ်ချဳဓရာၚ်မံၚ် ပ္ဍဲဂကောံရီုဗၚ် ပရေင်မၞိဟ်တံကီု၊ သၟတ်နူပွိုၚ်ဍုၚ်သ္အာၚ်ဂမၠိုၚ်ကီု ညးတိုန်စိုပ်သီုဖအိုတ် ပံၚ် (၁၀၀) တၠပြၚ်တုဲ သၚ်နာယက (၇) တၠ တိုန်စိုပ်လဝ် ဒၞာဲကၠောန်ဗဒှ် ပ္ဍဲဌာန ဘာအသောကရာမ လ္တူဍုၚ်မုဟ်ဍုၚ်ရ။

ညးတာလျိုင်အခေါင်ဟီုဂးနွံမွဲတၠဂှ် “ပ္ဍဲကဵုကိစ္စလၟေၚ်ကမၠောန်အဓါန်ဂတဟီုဂှ်တှ်ေ ပြဟ်ဟ်နူကဵု သၟတ်ပွိုၚ်ဍုၚ်ဂမၠိုၚ် သွက်ဂွံဘိုၚ်ပါလုပ်ချဳဓရာၚ် ကရောံသၚ်ကျာ်ဇၞော်အ္စာရာမညနိကာယ ပရဟိတ ချဳဓရာၚ်မံၚ်ကိစ္စသွက်ဂွံထံက်ပၚ် တွဵုရးရခေၚ်မ္ဒးလဝ်လဗိုတ်ကျာ ပြဟ်ဟ်ဏအ် သဳကၠဳချပ်လဝ်နွံ” ဟီုလဴရ။

ပ္ဍဲကဵုကောံဓရီုဝွံ အစဳဇန်သ္ကုတ်ပထမ သၚ်နာယကဂမၠိုၚ် ဟီုဂလာန်သြဝါဒတုဲ သၟတ်နူပွိုၚ်တိုက် တိုန်စိုပ်ဂမၠိုၚ်ဆက်မိတ်ရေၚ်သ္ကံအိုတ်တုဲ မွဲအဆက်ဓရ် နူကဵုညးတာလျိုၚ်ဂမၠိုၚ်သောၚ်ကလးပ္တိုန်ထ္ၜး

သၞောဝ် ဂကောံတုဲ ပ္ဍဲကဵုအစဳဇန်သ္ကုတ်ဒုတိယ ရုပ်သီထောံညးတာလျိုၚ်တြေံဂမၠိုၚ်တုဲ ကလေၚ်ရုဲစှ်ပ္တိုန် ညးတာလျိုၚ်တၟိဂမၠိုၚ်တုဲ ဆေၚ်စပ်ကဵုလၟေၚ်ကမၠောန်သွက် ဂွံဓမံက်အာရုပ်ရဴအဓါန်ဂမၠိုၚ်လေဝ်သဳကၠဳကၠုၚ်လဝ်နွံရောၚ်ဂှ် သၟတ်ညးတိုန်စိုပ်ကောံဓရီုမွဲတၠ ဟီုရ။

ဥက္ကဌဂကောံသၟတ် နာဲဇဲမာန်ဂှ် “စပ်ကဵုပရေင်စဵုဒၞာဲဂဥုဲၜူမာဲဂှ် ဆက်ဖျေံအာပရေင်ကမၠောန်ဂတနွံတုဲ ဗွဲတြးပိုဲဆက်သဳကၠဳဖျေံအာဗီုဏောင်၊ သၟတ်ပွိုင်ဍုင်မုဟ်ဍုင် စကာသုင်စောဲဂဥုဲၜူမာဲဂၠိုင်မံင် ပြာကတ်မံင် ကွေံရ ညးတၞဟ်ဟီုစမံင်” သောင်ကလးလဝ်ရ။

ဂကောံသၟတ်မန်ပွိုၚ်ဍုဟ်မုဟ်ဝွံ သ္ပပ္တံနူကဵုသက္ကရာဇ်သၞာံ ၂၀၀၄ တေံ စဒက်ပ္တန်ကၠုၚ်တုဲ စဵုကဵုအခိၚ်လၟုဟ်ဘိုၚ်ပါလုပ်ချဳဓရာၚ်ကၠုၚ် လၟေၚ်ကမၠောန်ပရေၚ်ဂကူပရေၚ်မၞိဟ်နာနာသာ်တုဲ နကဵုဗီုပြၚ် ဂကောံညးကဵုကသပ် (၅)တၠ ဂကောံဥက္ကဌ (၃) ဂကောံညးအုပ်ကာ (၃) ဂကောံနာယက (၇) တၠပါလုပ်တုဲ ဒက်ပ္တန်ကၠုၚ်လဝ်ဂကောံ ဂးရ။

Photos-ဇာနဲဥူ