ပရေင်အုပ်ဓုပ်ပၞာန် ကာလကာမံက်တိုန်စၟတ်လဝ်ဂှ် ဆက်ဏာအာယုက် ၆ ဂိတုပၠန် NDSC ဖျေံသ္ဂုတ်သွာတ်

အဝ်ဂတ် ၀၁

နကဵုပရေင်အုပ်ဓုပ်ပၞာန် ကာလကာမံက်တိုန် စၟတ်လဝ်ဂှ် ဆက်တုဲ ထပ်ထပဵုဏာအာယုက် ၆ ဂိတုပၠန်ရောင် ဂကောံနစက ညးတာလျိုင်သၠုင်အိုတ်တံ ကၠောန်သ္ပကောန်ဓရီု ကံင်သဳပရေင်စဵုဒၞာကောန်ဂကူကေုာံ ပရေင်ဂီုကၠီု National Defense and Security Council ပ္ဍဲဂျူလာင် ၃၁ ဖျေံဏာသ္ဂုတ်သွာတ်ဂှ် နစက ပတိတ်လဝ်ပရိုင်ရ။  

ဂကောံနစကသီကေတ်လဝ်အဝဵု နူသၞာံ ၂၀၂၁ ဖေဖဝ်ဝါရဳ ၁ တေံဂှ် နကဵုသ္ဇိုင်သၞောဝ်ပရေင်အုပ်ဓုပ်ဍုင် ၂၀၀၈ ဟေင် အုပ်ဓုပ်ပကင်ရင်မံင်ရောင် ဂးတုဲ ကာလကာမံက်တိုန် ၆ ဂိတုမွဲဝါ အလန်ဏံ မရနုက်ကဵု ၄ ဝါ ထပ်ဆက်ဏာအာယုက်ပၠန်ရ။  

စနူတ္ရဲဏံ အဝ်ဂတ် ၁ ဒဵုစိုပ်ဂိတု ဒဳဇြေမ်ပါ ၃၁ တေံ ပွိုင် ၆ ဂိတု နကဵုပရေင်အုပ်ဓုပ်ပၞာန် ကာလကာမံက်တိုန် စၟတ်လဝ်ဂှ်မ္ဂး နစကဂှ် အမိင်ဗီုညးတံနွံပၟိက် ဆက်ပတိတ်အုပ်ဓုပ်ပကင်ရင်အာ မာန်ရောင် ဂွံတီရ။  

တုဲပၠန် ပ္ဍဲကာလဏံဝွံ ဂကောံ CRPH, NUG, PDF တံကီု သီုကဵု EAO လ္ရဵုတံကီု ဗီုပြင်နာနာ နနဲပကီုပရာတ်နာနာသာ် ကၠောန်ဗ္ဒျ်မံင်တုဲ နကဵုဒပ်ပၞာန်ဗၟာ ဒၞာဲဒေသနွံမံင်ပၟိက် ပြေင်ဇန်ဝေင်လဝ်ပၞာန်တံဂှ် အတိုင်သၞောဝ်ဥပဒေရောင် ဂအုပ်သ္ကိုပ်ပၞာန်ဇၞော်အိုတ် မေန်အံင်လှိုင်ဟီုဂးပတိုန်ထ္ၜးလဝ် ပ္ဍဲကောံဓရီု NDSC ဂှ်ရ။  

ဍုင်ရးနိဂီုသွက်ဂွံၜိုဟ်သြိုဟ်ညိင်ဝပ်အာကေုာံ ပရေင်သၞောဝ်ဓဝ်ညံင်ဂွံဇဳဗျာပ်အာမာန်ဂှ် လ္တူအကာဲအရာ ဒၞာဲဒေသနွံကၠုင်ပၟိက် သွက်ဂွံပြုပြင်စဳရေင်ထပက်ဝင်အာပၞာန်ကီု စပ်ကဵုပရေင်ထိင်ဒဝ်တိဍာ်လေဝ် ဗွဲမစိုပ်တရဴ ဆက်ရေင်တၠုင်အာရောင် ဂအုပ်သ္ကိုပ်ပၞာန်ဇၞော်အိုတ် မေန်အံင်လှိုင်ဟီုဏာလဝ်ဂှ် ဂွံတီပရိုင်နူဌာန်ပရိုင်အလဵုအသဳပၞာန်ရ။

Photo-ကောန်ဓရီု ကံင်သဳပရေင်စဵုဒၞာကောန်ဂကူကေုာံ ပရေင်ဂီုကၠီု NDSC